Daniw Laeng

(Ken ni Anib Miguel itoy a Hulio 22)

Agbabawiak kadi no nasapa a sinursuruanka
Nga agbilang— ammomon a duan a panagtutudom
Ket sapulemon dagiti keyk, lobo, bulbullagaw
Ken ubbing a karinnay-awmo? Basolko kadi
No nagballigiak a nangisarusar iti kuppokuppom
Iti umno a panagamirismo iti maris ket itan
Awagam iti “abi” ti nalabaga a fast food restaurant
Uray no ania kada dakkel nga uyokan ken pato
Ti mangpaypayapay kenka? Diak kayat a surotem
Ti tunggal panagungap ti ngiwatko ket iriawmo met
Ti amin a balikas nga isawangko. Ammom kadi
A tagtagaimpek ti aldaw a mabalikasmon ti tatang
Imbes a pa-pi wenno da-di nga insuro ti telebision?

Awanen dagidi agpatnag a kinarakista. Awanen
Dagiti rabii a daniwak dagiti narimat a bituen
Wenno naumbi nga amian. Awanen dagiti patangan
A nasangal iti labutab ti serbesa wenno nanam
Ti mani. Agsilpon ti panagsangitmo iti ibabangonko
Ket templaek ti gatasmo bayat ti pannakariknak
A bunga dayta ti kasla namalmalo a bagi iti trabaho
Ket tumamdag manen ti parbangon a pananggelgelko
Kadagiti lupotmo a drinowingam iti tapok
Wenno pitak. Kabayatanna, nargaan ni inam
Kalpasan a napasusona ni adim a di met makaawat
A dimo pay maawatan ti panagadi— agrungaab
Iti nakair-irut nga arakupmo. Ket addakami
Iti nagtengngaanyo, nagrinnakab dagiti bukotmi.

Ammok nga iti naganus a panunotmo, dimo maawatan
A daniw laeng ti isagutko. Ngem ilawlawagkonto—
Inton maamirismon a panangipateg ti panagipaigupko
Iti digo ti dinengdeng ken panangilemmengko iti kola—
No apay a nasudsudi ti panangibalikas iti rikna
Ti ama a kalanglangam unay malaksid iti dila
Ngem ti agkasangay a ray-awen da bulbullagaw
Ken “abi”. Ken subad dayta iti panagkumpasmo
Tunggal kantaen ‘toy amam a buttaw ti bolsana
Ti “Dungdungnguenkanto”.

A. SOTELO TABAG
Sta. Teresita, Cagayan