batonlagip iti nagkurusan

iti daytoy a nagkurusan, ipatakderko ti batonlagip
ni imnas a saksi dagiti nagdaliasat iti dana nga agturong
iti saklot ti bullalayaw a nangisikog iti balitok nga itlog
ti kannaway. yarkosko dagiti pagilasinan a kas koma
iti panagluana iti dara a mayurit iti agmatuon kas ballaag
ti aliaw iti tunggal dapan a mangusat iti kalsada dagiti kigaw
a dios, isuda a nangitalaw iti kinatudio ti nakem ken nagbasak
iti sagrado a laem dagiti natalinaay a pagtaengan ti ayan-ayat.
wen, ikitikitko iti sakaanan ti batonlagip ti rennek a diak naem-eman
kadagiti desdes ken tanap, karayan ken pussuak; pagminarek
ti guyugoy a mangep-ep iti dukot ken upay dagiti dapan ken mangbugiaw
iti amin a saem nga agay-ayaw kadagiti bakras ket pagam-ammuan
ta agpasallabay iti abagak a nakaisangolan ti krus dagiti kalbario
ti pagtaengan, pagadalan, simbaan ken malakaniang.

iti panagtakderko iti nagkurusan, maipusingak kas iti piek
nga aglemmeng iti panawen ti panagampayag dagiti kali:
iti panagkubukobko, mangeddengak iti dana a daliasatek
tapno maitarayak ti peggad dagiti kuko a mangdawis
kadagiti sallapiding iti bukotko a batonlagip met dagiti lallay
ken salidummay ti kannag. diak masinunuo ti distansia ti didigra
ken talinaay kas iti ullaw a nagsatan iti nalulem a malem, agallaalla
dagiti payyak ken ipus nga agpasag iti bakir wenno kapanagan…

iti bangonek a batonlagip, ilimogko dagiti mapespes a lua,
ling-et ken dara dagiti linimosko nga arep-ep ti sensilio
kadagiti nagsulian ti dung-aw ken saibbek ti away ken eskinita
ken panagibi ti temtem iti parbangon a nagbakuit dagiti bara
ti ikamen ken pungan ket nagngilangil ti nautoyan a saltek,
tapno agtakderto a batonlagip dagiti di naimaldit a sangit ti puli.

ariel s. tabag
quezon city, phils.
pebrero 2, 2005

no sumgiab doliar ken gasolina

no sumgiab doliar ken gasolina
bumtak ti bus, maidasay ti biag,
agdung-aw ti dara ti kalsada.

maungtan dadaulo nga ina,
puoranna kinelleng ken bangkag
no sumgiab doliar ken gasolina.

nengneng, muslim kanot' terorista
inna, ubbing dagiti magubat;
agdung-aw ti dara ti kalsada.

maibolsa uray binting ken lua
masidat' dara ta aswang ti vat---
no sumgiab doliar ken gasolina.

agpunsion dagiti kongresista
gabinetet' mangan ken agtig-ab;
agdung-aw ti dara ti kalsada.

aglibut dagiti santot' edsa,
agkurnoda't dios ti malakaniang:
agdung-aw ti dara ti kalsada
no sumgiab doliar ken gasolina.

ariel s. tabag
quezon city, phils.
pebrero 22, 2005